Assam Angh agientsü takhangba agüja Congress-i lungkak ait

Guwahati, November 27 (Agencies): Assam Angh, P B Acharya agientsü takangba agüja Hokolbar nü Assam tesem balala nungi Congress nung inyakertem Guwahati nung adenshia lungkak aitogo.
Congress-i, Acharya-i jembiba oji linük Temzüng mezüngmeshiba lir aser India indang secular tamentaktak amokmerenba lir, ta ashi.
Tang state sorkar tashi nung aliba Congress party züngsemtemi Guwahati nung Kamrup (metropolitan) deputy commissioner’s office ajanga Tir dangi memorandum ka agütsüogo.
Assam Pradesh Congress Committee (APCC) Tir, Anjan Dutta-i, linük Temzüng akhümket ayutsü atema Acharya tangsa agientsüla, ta ashi.
“Hindustan ya Hindu nunger atema lir” ta jembiba oji tai rateta agiogo, ta shia Acharya-i “Hindustan ya Pakistan aser Bangladesh na nung reshikangshi tia nung alir Hindu nunger atema” ta jembiba lir ta jangjashitsüogo.
Ajisüaka Dutta-i, Acharya ama ka nungi item ama sangdong ajanga Assam aser linük ajungalen tashishitep adokogo, ta ashi.
Tir dangi mepishiba shidi nungji Dutta-i, “Hindu nunger, Muslim nunger aser tanga tamangba loktitem tsüngda tesempatep adoktsüsa Angh-i jembiba oji APCC-i sashia aitsür. Iba oji linük Temzüng mezüngmeshiba lir aser India indang secular tamentaktak amokmerenba lir,” ta zülua lir.
Taküm June ita nunga Congress-i Angh anema shidi ajanga Tir Mukherjee dang, Acharya-i BJP aser RSS agent ka ama inyaker, ta aija liasü.
Dutta-isa, Hokolbar nü memorandum agütsübaji taküm June ita nung Acharya agientsü Congress-i akhangba maneni kasa takhangba agütsür lir, ta ashi.
Kasa onük nung Assam Chief Minister, Tarun Gogoi-i Acharya Angh menden nungi agientsü takhangba agütsür anogo ishika tsüngda Assam Congress-ia kasa takhangba agütsüogo.
Yashi Brihostibar nü Dutta-i, India sorkari ita ka tsüngda Acharya Angh menden nungi magienra onoki anogoshia Raj Bhavan kima lungkak aittsü, ta amokmerena liasü.