Assam Angh-i Guwahati kitsükkirong atalokdak semdang

Guwahati, November 13 (Agencies) : Assam Angh PB Acharya-i tanü Fancy Bazar, Guwahati nung kitsükkirong lendong atalokba tesem semdang.

Angh-i takoksa ajururtem den ajurutepa sensaksem aser ketdangsertem dang nungi iba timtem indang osangtsüsang metetpela.

Kamrup (metro) DC M Angamuthu aser city Commissioner of Police Mukesh Agarwal nati Angh Acharya dang lendong atalokba indang osang ashi.

Acharya-i osangbenertem den sensaksemdang, takoksa ajururtem tekaratiba nung yaritsübaji tongtipangtiba lir, ta ashi.

“Iba lendong atalokba indang osang bushiteptsü, saka tamasa timtem ajururtem yaritsü asoshi mapa inyaktsü” ta paisa shisem.

Kirong lendong atalokba sülen ghonda 24 süir yashi ang mi enseptet saka tesem kar nung mokozü adokba manenba agi tanüa mi ensepertemi item tesem nung tzü inogo.

Bodbar aonung Guwahati nung kitsükkirong lendong tamajungtiba atalok aser iba lendong nung Fancy Bazar nung shilem tulubalen rongdok. November 11 aonung 7 ako meta New Market nung fire crackers apokba ajanga lendong atalok ama temulung melemi bilemer.

Yashi Assam Chief Minister Tarun Gogoi-ia iba tesem semdang aser bushisüngdang asütsü tetuyuba agütsü.