Assam Angh-i Meghalaya Angh repsema abentsü

Guwahati, January 27 (Agencies): V Shanmuganathan-i Meghalaya Angh menden nungi anenba sülen Hokolbarnü linük Tir, Pranab Mukherjee-i Meghalaya Angh menden repsema inyaka atatsü asoshi Assam Angh, Banwarilal Purohit nem mapa nungloktsüogo.
Shanmuganathan’er staff züngsem 98-i shidi ka ajanga Ato kilonser, Narendra Modi dang, pai Angh akhümket menden dak mapetba inyakogo, ta metetdaktsü.
Kasa shidi nungji, tetsür dak tim mesüi benshiba aser staff tem mezüngmeshiba densema pai aibelen inyakba aika metetdakja lir.
Pai Angh menden nungi anenbaji Governor’s House dak mapet inyak ta tai tongloktsüba nung ajemdaker anenba dang lir, ajisüaka pa anema tanga onüktem atema bushisüngdang masü.
Tamalen osang ka ajanga ashiba agi, Shanmuganathan-i Public Relations Officer (PRO) ka shimtsü lemtet, aser iba mapa atema shortlist asürtemji tetsürtem dang liasü.
Ano mapa nung shimoktsü atema inyakdang Shanmuganathan-i candidate tetsür ka dak azüit aser tebang mesep ta tai tonglokja lir. Iba tatalokba sülen lai iba tatalokbaji lar medemer osangbener ka dang ashi.
Iba dak alia staff temi shidi nungji, “Pa mapatem ajanga Raj Bhavan akhümket aser Raj Bhavan nung inyakertem yirutsür. Pai iba menden agizükba nungi tenzüka mapang shia staff tem kanga mezüngmeshir, shisatsü anibelemdaktsür aser reshikangshir,” ta shia lir.
Angh nem item tai tongloktsüba sülen January 26, 2017 nü lokti tetet ana- Civil Society Women Organisation (CSWO) aser Thma u Rangli (TUR) nati Raj Bhavan kima Shanmuganathan dang pa Angh menden nungi alutsüla ta takhangba agüja longkak aita liasü.
Hokolbarnü Tiri Shanmuganathan-i Angh menden nungi anentsü shidi agütsüba agizüka liasü.