Assam & Arunachal Pradesh nung AFSPA tera salatsü akok

Itanagar, July 5 (Agencies): BJP-i yimsü asüba state ana- Assam aser Arunachal Pradesh nung Union home ministry-i Armed Forces Special Powers Act (AFSPA) “partial withdrawal” asütsü akok.
State ana nung “security” tensa tajungba akümba agi AFSPA ozüng salatsü akok, ta ketdangsertemi ashi.
Taoba mapang dang nungi Assam aser Arunachal Pradesh nung tensa tajungba kümogo aser AFSPA ozüng salatsü junger ta home ministry-i asadangtet, ta ketdangsertemisa shisem.
AFSPA tera salatsü atema home ministry-i state sorkartem dang nungi parnok tebilembatem meshiogo. Taoba mapang Assam aser Arunachal Pradesh state tem AFSPA mapang ajemogo, ta ketdangserisa metetdaktsü.
Taküm May ita Centre-i Assam ajungalen ita asem atema AFSPA kübok “disturbed” area alitsü ta osang metetdaktsü. ULFA, NDFB aser tanga telungpur teloktemi ozüng alema mapa inyakba nung ajemdaker parnoki iba ozüng agüja liasü.
Maneni, Centre-isa Arunachal Pradesh nung – Tirap, Changlang aser Longding district tem kübok police station 16 telongtet nung ita asem atema AFSPA kübok ‘disturbed area’ ta sangdong.
AFSPA ya Assam nung November 1990 nungi aser Arunachal Pradesh nung January 2016 nungi district asem nung alitsü benoka liasü.