Assam aser Arunachal nung yipru lendong nung nisung 7 asü

Guwahati/ Itanagar, April 29 (Agencies): Assam kübok yipru aser tsüngi ajanga lendong balala nung nisung pungu tashi asü, ta ketdangsertemi tanü metetdaktsü.
Yasüng yipru tesashi aondang Assam kübok Tinsukia district nung aliba Margherita süngolu nung kibong ka nungi züngsem asem tashi asü aser pezü yiru. Yipru jagi kilem chirepdaktsü aser yinjung agi nisung asem nenset aser pezü yirutsü, ta ketdangsertemi ashi.
Ano, Dibrugarh district nunga Narayan Chitua ta ser nisung ka tsüngi agi aiset, ta ketdangserisa shisem.
Barak Valley kübok Cachar district nunga yasüng ayaterm nung yipru ajanga süngdong ka laodakja tantsür ka nenset aser lar kinunger asem yirutsü, ta police-ia metetdaktsü.
Yasüng Assam kübok tesem aika nung yipru tesashi aonba ajanga kiojen aika raksatsü, süngdong aser electric yindongtem laodaktsü aser ibaji ajanga tesem aika nung power supply mangutsüsa aküm.
Arunachal Pradesh nung yashi nikongtsütsü Changlang district nunga tsüngmok atena  tzünglu tesashi aruba ajanga lendong nung tetsür chanu ana asü ta osang angazüker.
Yipru ajanga süngdong ka laodang K Chakma aser Jubina Chakma na anenset. Yipru tesashiji ghonda ka shi süidang ki aika raksatsü, süngdong aser electric yindong aika laodaktsü ta ADC, Bordumsa-i osangbener dang ashi.