Assam aser Meghalaya CM na ajuruteptsü

March 29, 2017 (Agencies): State ana tsüngda arrtsü dak sendakba nung mangatettep aliba atema jembishinüteptsü asoshi Meghalaya Chief Minister Mukul Sangma-i April 3 nü Assam Chief Minister Sarbananda Sonowal ajurutsü, ta Mongolbarnü ketdangser kati metetdaktsü.
Yaküm May ita election nung takok ngua Assam CM mendeni atuba sülen Sonowal tang mezüngbuba Meghalaya Chief Minister den ajuruteptsüba lir.
“Chief Minister anapronglai arrtsü dak sendakba nung ken o lemteptsü asoshi April 3 nü ajuruteptsü atema molungtepogo,” ta Maghalaya ketdangser kati osangbenertem dang ashi.
Iba senden nung Meghalaya nungi Sangma meina pa indang deputy Roytre Christopher Laloo, Home Minister Horju Donkupar Roy Lyngdoh, Law Minister Roshan Warjri, Border Area Development Minister Prestone Tynsong, Chief Adviser D.D. Lapang aser tanga tongtibang ketdangsertemi shilem agitsü.
Arrtsü dak sentakba nung olemteptsü asoshi Sangma-i June 5, 2010 nü iba mapang menden nung aliba Assam Chief Minister Tarun Gogoi den ajurutepa liasü. Iba sendenji tatembangba liasü.
Tesüiba mapangtem nung Meghalaya-i tesem 12; Upper Tarabari, Gizang Reserve Forest, Hahim, Langpih, Borduar, Boklapara, Non-gwah-Matamur, Khanapara-Pillangkata, Deshdemoreah, Block I & Block II, Khanduli-Psiar aser Ratacherra parnok litsü nung lir ta sayua map aser kulikaket balala agütsüa liasü.
“Onoki talangka bushisüngdanger onoki akhangba li dak sendakba nung map aser kulikaket tejangja balala agütsüogo,” ta Meghalaya ketdangser kati ashi.
Sonowal-i taoba mapang nung Assam nunger kidanger state Meghalaya, Nagaland aser Mizoram den arrtsü nung mapang talangka mangatettep alibatem temzüng nung aliba ama aser tangatettep nung tembangtsü, ta shia liasü.
Assam, Nagaland aser Arunachal Pradesh arrtsü nung mangatettep aliba ken o Supreme Court nung tang tashi mebentetteti yua lir.