Assam aser Naga nunger tsüngda akangjungshiteptsü bangjemogo

Guwahati, October 09 (Agencies): Kidanger state ana- Nagaland aser Assam na tsüngda akangjungshiteptsü aser yimjung nung alitsü atema tanü Naga aser Assamese lokti tentettem-i state ana tsüngda mulung melemtep, tsükchitep aser tamajung bilemtepba shisatsü ajak endoker state ana putepa alitsü asoshi mapang shia jenjang balala nung ken o jembitsü bangjemogo, ta Naga-Axom Round Table-i külem sangdong ka ajanga ashi.
Guwahati nung tan mezüng Naga-Assamese ’round table talk’ nungsa state anaprong nungi lokti tentettemi ‘people-to-people contact’ tajungba asoshi Assam aser Nagaland sorkari naprongla den Centre sorkari state ana dak sentakba mangatettep onüktem tajungtiba nung telatetba dangi arutsü asoshi süoki ia agia inyaktsüla, ta bangjemtep.
State ana tsüngda kanga nüngdaka aliba anogo ka piyong ken o jembiba maparen ya Nanda Talukdar Foundation (NTF) Guwahati-i ayongzüka liasü, aser iba senden nung state anaprong nungi teshimtetpurtem denogo.
State ana arrtsü tesemtem nung mepetmesü adoka, tatalokba tila ka nungi tensa raksadaktsüba mapang ibaji junga bentettsü atema lokti tentettem nungi kanga dang junga latetba teinyaktsütem kar alitsü nüngdak ta state anapronglai mulungogo.
October 09, 2015 nü Khanapara, Guwahati nung Naga-Assamese Round Table talks mapang state ana tsüngda akangjungshiteptsü lemtet, kidanger state ana tsüngda maneni ken o jembitsü atema teti atema teinyaktsür ka alitsü lemtet, aser iba dak sentakba nung Asam Sahitya Sabha aser Naga Hoho nati acha ayanga Co-ordination Committee ka tentettsü lemtet, October 9 nü Round Table ayongzükba tentet, Nanda Talukdar Foundation (NTF)-i Asam Sahitya Sabha aser Naga Hoho na tsüngda amalitepa yariteptsü lemtetogo.
Senden nungsa state ana nüburtem tsüngda teka agi yangluba mapa, shisaliok, sobaliba, saisapong, shishilembaba aser alima tzü mopung kümzüka ayuba nung amaliteptsü atema kija aser teloktemi pei akokba agi inyaktsü bangjemogo.
Tanü iba senden nung Nagaland nungi social worker aser yimjung atema inyaker, Niketu Iralu lenisüba nung Naga Hoho Tir, Chuba Ozukum, Naga Mothers’ Association Adviser, Prof Rosemary Dzuvichu, Naga Students’ Federation (NSF) Tir, Subenthang Kikon, Border Peace Committee (Assam-Nagaland) Coordinator, Temsu Wathi Ao, Media practitioner Bano Haralu nunger aden.
Ano külen Assam nungi shisashir, Prof Udayan Misra lenisüba nung, Asom Sahitya Sabha Tir, All Assam Students Union Chief Adviser, Purbanchaliya Tai Sahitya Sabha tir, taoba mapang Upper Assam Commissioner, Sayad Iftikhar Hussein nunger denogo.
Asomiya Pratidin yimobilem zülur aser NTF Tir Nitya Bora lenisüba nung agiba senden nung shisashirtem, osangbener taintem, ocet zülurtem aser lokti asoshi inyakertem aika denogo, ta sangdong ajangasa metetdaktsü.