Assam Assembly election

Assam nung züngsem 126 agi akümba Assembly atema taküm April 4 aser April 11 anogotem nung election agitsü. Assam nung vote agütsür nisung crore 19.8 den timba lir aser parnoki taruba state sorkar kümtettsü atema yimsüsürtem shimtsü aser iba osangji May 19, 2016 nü yimjak nung metettsü. Tang teinyakdak Chief Minister Tarun Gogoi-i anir Congress-i kümsük asemben atongtepa assembly elections nung takok nguyonga aruogo, saka 2014 Lok Sabha elections nung Narendra Modi’er mopungsem ajanga Assam nung Congress-i Lok Sabha menden 14 nungi asem nung dang takok ngutet. Taküm assembly election nung Congress-i menden 122, Bharatiya Janata Party (BJP)-i menden 80, Asom Gana Parishad (AGP)-i menden 25, Bodoland People’s Front (BPF)-i menden 13 aser All India United Democratic Front (AIUDF)-i menden 76 nung tokteptsü. Assam election nung tanga yimtenren teloktem dak alia India nung yimtenren telok tulutiba ana- Congress aser Bharatiya Janata Party (BJP) na tsüngda tetoktepba tulubalen asütsü. Taküm India nung assembly elections agitsü aliba state tem – West Bengal, Kerala aser Tamil Nadu dang nungi BJP-i sorkar tashi abentsü atema maongka angutsü amai ajitetba state ji Assam dang lir. Assam assembly election indang osang ajanga Prime Minister Narendra Modi-i nübortem atsür aruteter ta jembiba o nungittsü. Iba sempet ajanga Modi-i 2014 küm Centre nung sorkar kümtettsü tashi angu aser Assam Lok Sabha elections nung menden 14 nungi 7 nung takok angutsü teyari angu, saka Delhi aser Bihar Assembly elections ajanga BJP-i takok anguba tashi anenja liasü. Delhi nung Arvind Kejriwal aser Bihar nung Nitish Kumar nati elections nung chief minister nübo tajung ka ka ama BJP den toktepa takok angu. Taküm Assam nunga BJP-i asemben tashi Congress nungi Chief Minister Tarun Gogoi den tokteptsü. Gogoi-i taküm assembly election ji ‘Chief Minister aser Prime Minister na tsüngda tetoktepba’ ta südaktsütsü atema merangdang saka BJP-i taküm January ita Union Minister for Youth Affairs & Sports, Sarbananda Sonowal ji parnok chief minister nübo asütsü ta yimjak nung metetdaktsü. Assam nung BJP atema Modi indang tashiji kanga tongtipang asütsü kechiyong parnoki Lok Sabha nung menden aika takok ngutetyonga, parnok Assam nung tera kanga junga yanga mali. Iba khuret atema BJP-i Asom Gana Parishad (AGP) aser Bodoland People’s Front (BPF) den tesentaktep yangluogo aser ibaji ajanga taküm Assam assembly election ji asemsülen- BJP-i aniba teloktep, Congress aser Badruddin Ajmal’er All India United Democratic Front (AIUDF) tsüngda tokteptsü. Ajisüaka, yimten teloktem asoshi tekümdangtsüka la lir aser ibaji taküm Assam Assembly elections nung independent candidate 467 toktepba asütsü. 2011 assembly elections den medemdangra, Assam nung taküm independent candidate temji noklang nung shilem 76.8 agi teimba lir, kechiyong 2011 nungbo parnok 264-i dang toktep. Osang kar angazükba agi, yimten teloktemi parnok nem ticket melemzüktsüba yong parnok independent candidate ama tokteper, aser ibaji ajanga yimten teloktemi assembly menden aika nung timtem ajurutsü amai ajiteter. Taküm Assam election nung yimtenren teloktem tsüngda o atsütepba onük tongtipang kaji ‘senso aser bendanger’ ta asüba onük lir. BJP-i aniba teloktepi parnokji sensosangertem ta sayua nübo ayimtsü meranger. Külen AIUDF-i ozüng alema aruba Bangladesh nunger kümzüka ayutsü ta shia nübo ayimer. Taoba küm 5 tashi chief minister inyaka arudang Gogoi-i ozüng alema Bangladesh nunger kümzüka ayu ta nisungtemi aitsür aser iba ya ajanga Congress-i Bengali Hindu nunger vote mangutsü amai arentaka bilemer. Taküm Assam assembly election ji tesüiba election tem dang nungi khenyongi balaka asütsü aser shir teloki menden teimba takok ngutetaka, tanga telok kar teyari medeni sorkar tentettsü tashi mangutsü amai ajiteter.