Assam assembly nung state arrtsü memelenshitsü telemtetba agi

Guwahati, August 10 (Agencies) : NSCN-IM den tenangzüktep agiba ajanga Assam litsü nung teka maitsü aser NSCN-IM-i ‘Nagalim’ takhangba agütsüba nung Assam nungi shilem ka dang madentsü atema Centre-i inyakang ta Hombarnü Assam Legislative Assembly nung telemtetba agia metetdaktsüogo.
Centre aser NSCN-IM tsüngda tenangzüktep ajanga Assam nung yimten, litsü, rongsenren aser sobaliba nung tetsükdaktsü kecha malitsüla, ta Assam Legislative Assembly nungsa telemtetba agi.
Tanü Assembly nung onük asem telemtetba agiba nung Centre-i NSCN-iM den tenangzüktep agibaji yimjak nung metetdaktsütsü indang onük dena lir.
Assam nung BJP züngsemtemibo iba telemtetba anema noktak aser parnoki state sorkar dang Centre nungi osang aruba ata liang ta ashi.
“NSCN den tenangzüktep agiba ajanga asen state asoshi timtem bener marutsüra, onoki mashishir. Taoba mapang pei state litsü sasep nung dang Assam Accord aser Mizo Accord na agiogo” ta Assam Chief minister, Tarun Gogoi-i tanü ashi.