Assam atema lendong tulutibaji BJP lir: Rahul

Guwahati (Assam), March 31 (Agencies): Tanü Congress Party tatong Tir aser MP, Rahul Gandhi-i, Assam nung Congress sorkari inyaktetba tulutibaji state nung tanaben yimjung bener aruba lir, ta metetdaktsüba den külemi nüburtem dang, party maneni sorkari tashii arutsü atema taruba  assembly election nung party nem vote agüjang, ta mepishiogo.
Assam atema lendong tulutibaji BJP lir ta shia Rahul-i, kongsa BJP sorkar tashii arudir parnoki rara aser azütoktshi bener arutsür, ta aitsü.
Assam assembly election atema Digboi, Moran aser Tezpur nü nüboyim sentong nung jembidang Congress lenir Rahul-i, “Congress-i state nung tanaben yimjung bener arutsütetbaji takok tulutiba lir. Aser iba ya onoki asadangtetba masü. Iba ya, ni mapangshia nüburtem den shisalemsatepdang parnok dang nungi anguba kuli lir. State nung yimjung bener arutsütetba tenüngjji nüburtemi Congress nem agütsür,” ta ashi.
Assam atema lendong tulubaji BJP lir ta shia pai, BJP sorkar tashii arura parnoki state nung lokti balala tesünep nung aliba raksatsütsü merangtsü, ta ashi.
Paisa, “Assam ya India tila ka mesüker, yangji lokti, tamangba yimsü, kin aser sobaliba balala lir. Congress-i iba tesünep ya kadaktsüner. Ajisüaka BJP aser RSS-i iba telongjem raksaja linük nung parnok tangatetba benoktsü meranger,” ta ashi.
“BJP-i terenlok agütsütsü ta nangzüker. Saka kongsa parnok tashii arudir parnoki nisungtem tsüngda rara adokdaktsür,” ta paisa shisem.
Ato kilonser, Narendra Modi-i 2014 Lok Sabha election mapang nangzükbatem mataloktsütet, ta aija Rahul-i, “Modi-i bendanglen nungi ochimashi sen bener aruba sülen India nunger shia bank account nung sen lakh 15 inoktsütsü anngzük. Parnoki ochimashi sen bener marutetba dang masü saka BJP sorkari Vijay Mallya aser Lalit Modi nunger ama sentsüh alirtem yaria linük nungi jena yok,” ta ashi.
Assam nung April 4 aser 11 nü election agitsü, aser iba election nung Congress-i takok ngura parnoki atongkanga pezübenbuba state yimsüsütsü.