Assam BJP MLA dang Indian citizenship kuli meshir

Guwahati, Monupii 18 (Agencies): Assam nung lisopur tejangja (legal citizen) bushiba mapang ka nung Foreigners Tribunal (FTs) of Assam ajanga Mongputeni/October 2017 tashi bendanger 20,000 jungnüa lir ta sangdong. Aser iba maparen nungi nisung kata jenpua mali, kechiaser kin ajunga nungi nisung ajak iba inyakyim agi kongshir.
Iba maparen dak sendakba nung tang tesüsa atalokba osang ka nung, Barak valley nungi BJP MLA ka aser par kinunger ajunga dang parnok India lisopur ta kuli sayutsü asoshi foreigners’ tribunal ajanga osang metetdaktsüogo.
“Cachar nung aliba The Foreigners’ Tribunal No 1 ajanga Borkhola constituency nungi BJP MLA, Kishore Nath aser par kibong nungi züngsem trok dak temulung melemi ‘doubtful voters’ ta osang agütsü,” ta osangkaket ka nung shia lir.
Nath-ia pa nem iba osang agütsüba indang shiogo aser iba tribunal indang sangdong asoshi tasü itta nokdaktsü nangzükogo.
“Ni iba li indang jabaso ka lir… Barak valley nung soa intet aser ni India nunger. Ni aji jangjaa sayutsü,” ta pai ashi.
Tribunal ajanga iba ama osang ya Nath kinungtsü, Nilima Nath, adianu pezü, Matilal Nath, Pradip Nath, Jagdish Nath, Manik Nath aser adianu ka kinungtsü Rakhi Nath nunger nema agütsüogo.
Nath den par kinungertemi Foreigners Tribunal matsüngdang nokdaka parnok ya chichiba India nunger ta kuli sayutsü.
Iba osang angashia state Congress tir, Ripun Borah-i osangbener den jembidang, “Iba tetetzü BJP MLA ka India lisopur masü. BJP-i linük dang tatok meshitsüla,” ta ashi.
Iba ama mangatettep ya tang tasen masü. Taoba küm Assam police constable Abu Taher Ahmed dang Foreigners Tribunal ajanga pa India nunger ta kuli sayutsü osang agüja liasü.