Assam Border police-i bendanger putettsü device tasen ka amenoktsü sentong lir

Guwahati, Tsüklai/February 21 (Agencies): Assam Police, Border wing puri temulung melemi bilemba nisungtem aser ozüng alema bendanger linüki arua alirtem osang tejangjaba mangoka ayutsü atema electronic device ka benoka amshitsü renema lir.
Iba device nung noksa tangoktsü atema camera aser fingerprints rizünga ayutsü asoshi biometric device ka inoka lir.
Item feature dak alia iba electronic device yagi bendanger aser temulung melemi bilemba nisungtem indang data koba tesem nung iba device nung mangaoka ayu iba dang latitudinal aser longitudinal coordinates tem dena register sütettsü.
Assam kübok detention camp trok nung bendanger parnok 900 yua alir ajak idang osang tejangja iba electronic device teyari agia mangaoka yuogo, ta osang ka ajanga metetdaktsü.
Iba device nung mangaokba data ajak Border police headquarters, Guwahati Central server nung idangjisa adoktsü.
Border police ket nung tang iba device 39 lir aser state kübok police station ajak nung iba amala device benoktsü sentong lir.
Iba device jenjang kanga tasaka asüba agi Border Police puri fingerprint capturing device aser GPS storing software keta aliba customized tablets amshitsü sentong yangludar.
DGP, Border, Bhaskar Jyoti Mahanta-i ashiba agi, Border police-i yakta Assam nung bendanger asütsü ta temulungi melemi bilemba aser bendanger ta jangjaa aliba nisungtem atema centralised database ka amenoktsü aser parnok indang data mangaoka aliba nung temelenshi tera danga adokra idangjisa metettsü.
Border police, Foreigners’ Tribunals, NRC aser Election Registration Officers-i bendena aliba data nung meputep aliba putetba sülen centralized database ka amenoktsü asoshi sentong ya apitet.