Assam Chief minister Sonowal-i Rajnath Singh den India-Bangla arrtsü onük jembi

Guwahati, June 25 (Agencies): Deobarnü Assam Chief Minister, Sarbananda Sonowal-i Union Home Minister, Rajnath Singh den India-Bangladesh arrtsü tashi itshitsü densema tang onük aika nung o lemtepogo.
Iba senden tembangba sülen osangbenertem den jembidang Sonowal-i, “India-Bangladesh arrtsü shibangtsü atema künati jembiogo aser Home Minister-i iba dak sendaka nung akokba tashi agi Assam yaritsü ta shiogo,” ta metetdaktsü.
Arrtsü nung atsü atsüba maparen tenzükogo, ta Chief Minister-isa metetdaktsü.
“Ni iba tesem semdangogo. Ibaji onok atema tongtibangtiba teinyaktsü mapa lir,” ta paisa ashi.
Tamalen Rajnath-i, sorkar tashi nung aliba party, Bharatiya Janata Party (BJP) atema tongtibangtiba onükji India-Bangladesh arrtsü shibangtsü lir, aser 2018 küm June ita tashi nungbo iba arrtsü khenyongi shibangtsü, ta sangdonga liasü.
India aser Bangladesh na arrtsü kilometer 4,096 talang lir, aser iba nungjagi kilometer 262 bo Assam den arrtsüa lir.