Assam CM Gogoi-i Acharya agientsü akhanger

Guwahati, Nov. 22 (Agencies): Honibar nü Assam Angh, PB Acharya-i, “Hindustan ya Hindu nunger atema. Iba nungji kecha tai mali. Linük balala nungi Hindu nunger yagi arua litettsü. Parnokji bendanger masü. Iba nungji tetsübutsü kecha mali,” ta jembiba dak sentakba nung Deobar nü Assam Chief Minister Tarun Gogoi-i, state asoshi Centre-i teti atema Angh ka shimang aser Angh repsema abensang PB Acharya melenang, ta takhangba agütsüogo.
Sangdong ka ajanga Gogoi-i, “State telungjem meraksai alitsü atema aser terenlok maneni alitsü atema, state Angh atema teshisadang akaba nisung ka shimang,” ta metetdaktsü.
Gogoi-isa, Acharya-i “Hindustan ya Hindu nunger atema” ta jembiba ajanga state tekolak menden atema tenangzükba agiba pai raksaogo, ta aitsü.
“Assam Angh inyaktsü atema maneni Acharya dang süra, taruba küm assembly election nung pai RSS Pracharak ama BJP atema inyaktsü,” ta Gogoi-isa aija ashi.