Assam CM Gogoi-i Angh agientsü akhangba Mayawati-i pusemer

Lucknow/Guwahati, Nov. 23 (Agencies): Assam Chief Minister Tarun Gogoi-i state Angh, PB Acharya agientsü akhangba pusema tanü BSP tongti lenir Mayawati-i, ozüng nung aliba ama Acharya nem temerenshi agütsütsüla aser pa tangsa anentsütsüla, ta ashi.
Lucknow nungi sangdong ka ajanga Mayawati-i, “Iba ama temaba menden nung amener kati temzüng anema sangdongbaji tim masü. Centre sorkari RSS den sentakteper ka aser tangatetba nung anünga alir ka nem iba ama temaba menden agütsübaji kanga tia maka,” ta ashi.
Honibar nü Acharya-i, “Hindustan ya Hindu nunger atema” ta jembiba sülen Deobar nü pai iba oji jangjashija India Muslim tem Pak-i aotsü sadema lir ta jembiba dang, ta shiogo.
Acharya-i jembiba o pusema Union Minister, Kiren Rijiju-i, “Pai tamangba yimsü onük mejembi. Ibaji tamangba yimsü ka atema alakteta masü saka tamangba yimsü ajak atema liasü. Ajisüaka Muslim nunger Bangladesh-i yokba o bo ni mangashi,” ta ashi.
Deobar nü Gogoi-i, “Pai (Acharya) pa indang akhüm anepalu mesüteter. Angh office ji kanga akhümket office lir. Taoba NDA yimsüsüba mapang nung shimba Angh tem den-a ni inyaksema aruogo, saka iba ama nisung mengudang. Parnok ajaki akhüm keta inyak,” ta ashi.
“Item ama nisung Angh shimba aser item ama sangdong ajanga linük maintsü aser telongjem raksatsü. State telungjem meraksai alitsü aser terenlok maneni alitsü atema, teshisadang akaba nisung ka state Angh shimang,” ta Gogoi-isa ashi.
“Pa tangsa agientsüla. Nenoki (Centre) iba menden akhümket yua inyakteter nisung mashi ka shimang,” ta paisa shiogo.