Assam CM, Gogoi kü tembar tajung ka lir: Rakhi Sawant

Guwahati, September 10 (Agencies): Assam Chief Minister, Tarun Gogoi la tembar tajung ka aliba osang ka India yimsüsür, Rakhi Sawant-i metetdaktsüogo.
Sawant-i India’er yimtenren sabang nung shilem agiba den külemi, la ya Hindi film aser televsion sentong nung shilem agir actress ka lir.
“Gogoi kü tembar tajung ka lir aser ni pa den pezüben shi ajurutepa lir. Assam kübok Guwahati yimti nung ayongba Bihu benjungmong sentong nung shilem agitsü asoshi pai ni jaoka lir. Iba sentong nung dena Gogoi den külemi Bihu tsüngsang tsüngsangtsü sentong renema lir,” ta television sentong balala ajanga, arishi küm 36 tain Sawant-i metetdaktsü.
Ajisüaka, “Sawant-ji shiba? Ni la memetet,” ta arsihi küm 81 tain Gogoi-i ashiba osang jangjaogo.
“Ni Sawant den ajurutepba mebilemteter. Ni Chief Minister menden abenba yong ni nisung jenti ajurur. Ajisüaka, ni ajurur shiai ni par tembar ta jembira, ibaji ni asoshi khuret tulu asütsü,” ta Gogoi-i shisem.
Ano külen, Bollywood nung yangluba film ken ishika nung tsüngsanga shilem agila, Sawant-i tang India nung ken o tulu benoka tebenshidak, Sheen Bora tepsetba ken o nung tongti metpur, Indrani Mukherjee ama Sheen Bora taküm otsü film nung shilem agitsü asoshi renema lir.