Assam CM-i Basumatary’er jala nem appointment letter agütsü

Guwahati, Metsüremi/March 4 (Agencies): Assam Chief Minister Sarbananda Sonowal-i Deobarnü Baksa district kübok Tamulpur tesem nung CRPF sepai asür Maneswar Basumatary’er ki semdanga tasütait asür nem akhüm tetushi agüja liasü.
February 14 nü kiralongrartemi Jammu & Kashmir kübok Pulwama amakba mapang nung Maneswar Basumatary taküm sama.
Sonowal-i par ki semdangba mapang nung Basumatary’er jala Didwmsri Basumatary nem Directorate of Tourism, Assam kübok Assistant Tourist Information Officer mapa nung shimba appointment letter agüja liasü.
La mapa nung shiba ya tang temzüng yanglur aliba alema maongka balaka agüja shimogo.
Asür kinungertem den sensaksemba mapang Chief Minister Sonowal-i, Maneswar Basumatary ama tasütait nisung ka ajanga tarutsü nunga linük tenzüktsü asoshi nüburtem ajungmesotsü, ta ashi.
Iba masüdang Assam sorkari Maneshwar Basumatary kinungtsü den Baksa district kübok Tamulpur tesem nung sen lakh 20 agütsüogo.
Iba cheque ya Maneshwar Basumatary kinungtsü Sunmati Basumatary nem Assam Chief Minister media advisor Hrishikesh Goswami, State PHE Minister Rihon Daimary, Tamulpur MLA Emanuel Muchahary aser tanga BJP lenirtem matsüngda Kolbari yimtsüng nung agüja liasü.