Assam CM-i BDO tem dang sensakertem tenüng agütsütsü tuyu

Guwahati, June 25 (Agencies) : Hokolbarbü Assam Chief Minister, Sarbananda Sonowal-i Block Development Officer ajak dang pei local MLA tem den asüngdangtepa anogo 15 tsüngda sensakertem tenüng metetdakjang ta tetuyuba ka agütsüogo.
Sonowal-i BDO tem dang sensaker tenüngtemji Panchayat aser Rural Development Department nem agütsütsü tetuyuba agütsü.
Assam chief minister-isa BDO office tem model office ka ka kümdaktsütsü atema tetuyuba agütsü.
“Sensakertem timi anepalutsü aser parnok indang mapa inyakdang timtem majuritsü atema sorkari development block ajak model office ka ka kümdaktsünür” ta Sonowal-i ashi.
Sensakertemi parnok timtem mesüra khurettem osang benokdang tetsükdaktsü kecha majurutsüa BDO temi mapa inyaktsüla. BDO temi pei pei office tem nung complaint box ayutsü tuyur, ta Sonowal-isa metetdaktsü.
Assam nung ‘Pradhan Mantri Grameen Awas Yojana’ kübok ki lakh 2 yanglutsü maparen metembangba atema Sonowal-i khuret süa bilemba metetdaktsü aser paisa BDO tem dang taruba ita ana tsüngda iba mapa tembanga inyaktsü tetuyuba agütsü.
Taruba ita tsüngda BDO temi pei inyakba tesem nung Jan Dhan Yojana kübok bank account lapokba aser ‘Beti Bachao, Beti Padhao’, ‘Fasal Bima Yojana’, Start-up India, Stand-up India, ‘Mudra Yojana’ amala scheme kübük teyari angurtem tenüng tejangja metetdaktsütsü atema Assam chief minister-isa tetuyuba agütsüogo.