Assam CM-i Majuli nung scheme 647 tenzüktsü

Guwahati, November 5 (Agencies): Assam Chief Minister Sarbananda Sonowal-i Deobar nü alima nung ayong asetkong tulutiba- Majuli nung terenlok mapa inyaktsü atema scheme 647 tenzüktsü.
Majuli nung scheme temji MGNREGA aser 14 buba Finance Commission kübok sen crore 24.57 endoka inyaktsü.
MGNREGA kübok schemes 448 nung sen crore 21.90 aser 14 buba Finance Commission kübok schemes 199 nung sen crore 2.67 lemzüka lir, ta sorkar sangdong ka nung metetdaktsü.
“Assam nung yimtsüng 26,000 merenlok tashi state tejakleni maotsü. Majuli ya Vaishnavite sobaliba tiyongtsü lir aser district renlokdaktsüba ajanga state asoshi tajangzük tulu angutsü” ta Majuli nung Sonowal-i scheme tem tenzüktsüdang ashi.
State sorkari Majuli renlokdaktsütsü atema telemtetba agiogo aser iba district nung nübortem den angatettepa scheme aika inyaktsü, ta paisa shisem.
Majuli nung tzümetsüng aser ali anenzüka aoba khuret ajanga terenlok mapa inyaktsü tsübur, saka state sorkari iba asoshi project ka inyaktsü. Iba nung district ajungalen tzünokdangtem yanglutsü, ta Sonowal-isa metetdaktsü.
Amar Gaon, Amar Achoni kübok Assam nung yimtsüng ajak nung gaon sabhas 26,000 alitsü aser iba ya yimtsüngtem nung terenlok mapa inyaktsü asoshi lir, ta paisa ashi.