Assam CM-i Pradhan Mantri Ujjwala Yojana amenoktsü

Guwahati, June 18 (Agencies): Assam Chief Minister Sarbananda Sonowal-i Deobarnü Pradhan Mantri Ujjwala Yojana amenokogo aser Majuli nung iba teyari angurtem nem LPG connections agütsüogo.
PMUY amenokba mapang Sonowal-i ashiba agi, “Pradhan Mantri Ujjwala Yojana ya tekübok tia nung aliba tetsürtem ajungkettsüba, talisa yimdak yimtsüng nung alirtem koba Ato kilonser Modi nükla lir, iba den kanga dang puteba lir aser iba ajanga environment tajungba ka agütsütsü.”
PMUY amenokba sentong metenzük tsüngda CM Sarbananda Sonowal-i Majuli nung Majuli aser Jengrai-Haldhibari lenmang nüngshilong azüngja liasü, “Iba lenmang ana tajungba küma yanglushiba ajanga tesendaktep tajungba akümtsü,” ta pai ashi.
Honibarnü CM-i Majuli College auditorium nung Majuli district nungi HSLC aser HS tatidang nung jenjang tajung nguteter, distinction aser star mark angurtem nem tetushi agüja liasü. Iba sentong nung CM-i ashiba agi, “Kü constituency nungi kaketshirtem wadang balala nung takok anguba ngua ni kanga nematanga bilemer.”
Pai maneni Majuli ya Assam ajunga atema tanülaren ainba aser tangatetba nung renlok aoba tsütsü ajak atema nükrangtong ka asütsüla, ta ashi. Iba dak sendakba nung pai kaketshirtem dang district nung terenlok maparen balala asadanga alitsü asoshi aser meranga inyaktsü atema ajungshi.