Assam CM-i telungpur nem loan agütsü

Guwahati, March 1 (Agencies): Assam nung temai adokba telungpur nem ‘Swabalamban’ scheme kübok nationalised banks nungi loan den government subsidy lema agütsü.
Guwahati nung aliba Srimanta Sankardev Kalakshetra nung Assam CM Sarbananda Sonowal-i sentong ka nung sanction letters lema agütsü.
Iba scheme ya Home & Political Department of Government of Assam ajanga tenzük aser iba ajanga temai adokba telungpur 508 tashi ajangzüktsü.
Sentong nung jembidang Assam CM Sonowal-i temai adokba telungpurtem dang mapa tajung bendanga agüja inyaktsü aser state renlokba nung shilem agitsü ayongzük.
Temai adokba lanurtemi state renlokba nung tongti shilem agitsü aser sorkari teyari agütsüba ajanga parnok tali tashi aittsü, ta Sonowal-isa ashi.
‘Swabalamban’ scheme ajanga temai adokba telungpurtem taküm jenjang yanglushitsü aser linük nung senso tajung ka ka akümtsü imlar, ta paisa shisem.
Iba sentong nung DGP Kuladhar Saikia, Additional Chief Secretary in charge of Home Department Kumar Sanjay Krishna aser Principal Secretary of P&RD Department JB Ekka nungertemia o jembi.