Assam CM Sonowal-i Congress aitsü

Goalpara, Rongchii/April 18 (Agencies): Assam chief minister (CM) Sarbananda Sonowal-i Goalpara district kübok Dudhnoi nung nüboyimba sentong nung o jembidang Congress-i linük shidak yimsü masüba atema aitsü.
“Congress-i linük küm 60 shi yimsüsüogo, saka terenlok bener arutsü melena parnoki ochi mashi maparen nung tali temulung agüja inyak. Ibayongji nüburtemi parnok party lenirtem akhüm metsübur aser tashi melei kümogo,” ta CM-i ashi.
Sonowal ya, Dudhnoinung Gauhati Lok Sabha menden atem BJP candidate Queen Oja atema nüboyimtsüba sentong nung dena liasü. Iba sentong nüngja ya ‘Vijay Sankalp’ agütsü.
Par sorkari ajangtetba indang jembidang BJP lenir-i ashiba agi, taoba küm ana ser tesadang tsüngda Goalpara district kübok constituency pezüprongla nung terenlok aika bener aruogo kong lenmang yanglushiba aser tesendaktep tsütsü tetsükdaktsü aliba aginba densema lir.
Rabha Hasong Autonomous Council, Chief Executive Member (CEM) Tankeswar Rabha aser local MLA Dipak Rabha natia iba sentong nung o tatsütsü jembi aser nüburtem dang BJP nem vote agütsütsü ajungshi.
Tankeswar Rabha-i ashiba agi, Assam nung Congress puri küm 15 tashi yimsü süogo aser iba mapang lenla ajak nung kecha atalokjar mejangjai liasü.
Paisa nüburtem dang Congress pur nem vote agüja aibelen tesü, ta ashi.