Assam Congress lennir Himanta Biswa Sarma BJP nung adentsü

Guwahati, August 23 (Agencies) : Deobarnü Assam nung taoba state health & education minister Himanta Biswa Sarma-i New Delhi nung BJP tir Amit Shah den ajurutep aser kobi melii pa BJP nung adentsü ta metetdaktsüogo. Iba ya ajanga sangküm Assam nung assembly elections agitsü aliba nung Congress-i timtem ajurutsü akok ta bilemer.
“Kü den külemi Assam BJP tir Siddhartha Bhattacharya-i BJP national president Amit Shah den ajurutep. Onoki tawa Assam nung yimten tensa, tzümetsüng aser tanga onük aika jembiogo” ta tanü nikongtsütsü New Delhi nung Shah’er kima nung Sarma-i osangbener dang ashi.
“Ni Prime Minister Narendra Modi aser national president Amit Shah na lenisüba kübok inyaknür aser parnoki ibaji mulunga agizükogo” ta Sarma-isa shisem.
Sarma-isa pa indang Facebook account nung, “Tesüiba ita ishika Assam kübok tesem balala nungi nisungtemi kü dang ashiba sülen ni Prime Minister Narendra Modi lenisüba kübok Assam aser Northeast yanglushitsü atema BJP (Bharatiya Janata Party) nung adentsü” ta metetdaktsü.
2001 nungi Himanta Biswa Sarma-i Jalukbari assembly constituency nungi election nung shilem agiyonga arur aser pa ya Assam nung Congress lennir tongtipang ka liasü.
Taoba assembly election asem tashi Assam nung Congress-i sorkar atonga abenba mapa nung pai tongti shilem agiogo.
2011 nungi pai Assam nung Congress lenisüba menden melentsü atema ola adoktsü tenzük aser 2014 nung Tarun Gogoi-i aniba cabinet nungi anen.