Assam Congress MLA 9 BJP nung adentsü

Guwahati, September 05 (Agencies): Honibar nü Congress MLA 9-i parnok longjemer BJP nung adentsü lemtetba osang sangdongogo.
MLA tem jagi New Delhi nung BJP National Tir Amit Shah ajuruba sülen iba sangdong ya agütsüogo. Taoba mapang minister aser Congress lenir Himanta Biswa Sarma-i taoba hopta Congress toktsür BJP den denogo.
Sarma den MLA 9-i Congress toktsüba sülen tang state assembly nung Congress tashiji 69 (züngsem) lir, aser ibaji menden 126 aliba assembly nung menden tesadang ka (63) dang nungi timba lir.
Osang ka ajanga ashiba agi, ano Congress züngsem tajemba agi 10 bosa BJP nung adentsü BJP-i imlar, aser ibaji tan ita nungsa atalokra state election agitsü ita tenet lia Congress Party ya minority akümtsü.
Taoba Hokolbar nü Sarma BJP nung adendang pa pusemba atema Congress MLA pezü anentsüogo. Ano MLA pongui party anema inyakba atema show-cause notice agüja lir.
BJP nung adentsüpur Congress MLA temji- Sadiya constituency nungi Bolin Chetia, Pradan Barua (Jonai), Pallab Lochan Das (Behali), Rajen Borthakur (Tezpur), Pijush Hazarika (Roha), Kripanath Mallah (Ratabari), Abu Taher Bepari (Golakganj), Binanda Saikia (Sipajhar) aser Jayanta Mallah Barua (Nalbari) nunger lir.
Tanü Congress MLA Pradan Barua-i, “Onoki tanü Amit Shah ajuruogo aser BJP nung adentsü atema telemtetba agiogo. Parnok den adentsü anogoji BJP state Tir-i lemtettsü,” ta ashi.
Iba dak sentakba nung Congress State Tir Anjan Dutta-i, “Iba ya tasen tatalokba ka masü. Onoki item MLA 9 ya meteta dang lir, parnoki taruba election nung takok mangutsü ta meteta parnok tia melenshitsü teimla nung BJP nung adener. BJP züngsemtem-a aikati kü den tongtepratepogo aser Congress nung dennüba tebilemba lemsatepogo,” ta ashi.