Assam Congress MLA 9 BJP nung denogo

Guwahati, November 06 (Agencies): Hokolbar nü BJP lennir tejen aika matsüngdang Assam nung Congress MLA toku Bharatiya Janata Party (BJP) nung denogo.
Taruba küm election agitsü mapang anasa aruba mapang tang Assam yimsü tesüdak Congress MLA toku BJP-i par telok nungi pelashishia agizükogo.
MLA temi BJP lennir tain aser Union Sports minister Sarbanand Sonowal den Brihostibarnü parnok BJP nung adenba küli agüja senden ka menogo.
“State nung MLA timba kati Tarun Gogoi Chief Minister mesüdaktsünüi liasü, ajisüaka pa shim. Pa shimba sülen senden ka amendang pa Chief Minister masütsüla ta olen kar jembiba atema onok aitsü. Onoki state asoshi Chief Minister Himanta Biswa Sarma ang aginüa liasü aser MLA 54 tashi agi pa pusema liasü,” ta Hokolbar nü BJP nung adentsü alisang Congress MLA Pijush Hazarika-i osangbener dang ashi.
“Ato Kilonser Narendra Modi lenisüba kübok state renlokba nung adentsü asoshi onok BJP dangi meyiper. Onoki Assam ajungtsü meji iba telemtetba agi,” ta pai shisem.
Parnok toku rongnung MLA pezü- Pradan Baruah, Jayanta Malla Baruah, Piyush Hazarika aser Pallab Lochan Das nungeri party temzüngi memelaba benshiba ajanga MLA nungi anentsür liasü.
Parnok toku BJP dangi meyipa angashia Assam Pradesh Congress Committee nung Tir, Anjan Dutta-i parnok maliba ajanga tarüba küm election nung Congress makoksatsü, ta ashi.
“Parnok BJP dangi aoba ajanga Congress tilakata makoksatsü kechiba süra party nung mangatettep kecha mali. Shingaia Congress manokshitsütettsü. Congress-isa küm 100 yimsü asütsü,” ta Dutta-isa ashi.
Assam nung Gogoi leniba nung Congress-i atonga-atonga kümsük asembuba yimsü asür. State nung MLA 126 aliba nungi September 15 nü Himanta Biswa Sarma BJP dangi meyipa sülen Congress nungi MLA 76 kümogo.
MLA toku ya BJP nung bendanga adenba sülen ang Congress nungi anentsü asoshi tezüluba agütsütsü.
Tan BJP dangi meyiper parnok tokuprong ya tesüiba mapang Congress minister Himanta Biswa Sarma den kanga tesentaktep tajung lir. Parnok Congress nungi official süa anenba sülen state nung Congress MLA 68 dang akümtsü.