Assam Congress MLA-i BJP sorkar aitsür

Dimapur, November 25 (TYO): BJP sorkar kübok India nung rongsenkettsüng tia kanga mejungi kümogo aser ‘financial emergency’ ajurutsüsa kümogo, ta Assam Congress MLA, Bismita Gogoi-i ashi.
Hombarnü Dimapur nung Bismita Gogoi-i osangbener den jembidang “Centre-i India taginübatem yoka achir aser senotsü o rongsenkettsüng jenjang tamajungba kümdaktsür. Iba khuret ya BJP sorkari adokdaktsüba lir aser parnoki iba tebilemtsü abentsü” ta ashi.
Gogoi ya All India Mahila Congress nunga general secretary lir aser laisa ashiba agi “BJP sorkari demonitisation aser GST maparen inyakba ajanga rongsenkettsüng jenjang tamajungba kümdaktsü.”
India-i Regional Comprehensive Economic Partnership Agreement (RCEP) nung sign asü nungbo linük indang taginübatem aser national security nung kanga mejungi kongshitsü, ta laisa metetdaktsü.
BJP sorkari yimsüsüba mapang shisaliok bushibaren kanga ajema kümogo. Arishi küm 18-23 tsüngda aliba lanur 74% tashi college-i maoer. BJP sorkari lanurtem asoshi shisaliok tamendakdak aser mapa angudak ajak samatsüogo, ta Gogoi-isa shisem.