Assam Congress MP Sanjay Singh-i BJP nung adentsü

Guwahati, July 30 (Agencies): Assam nung ashishitep aketba Congress MP Sanjay Singh-i Mongulbarnü Rajya Sabha aser party nungi anenogo. Pai Bodbarnü BJP nung adentsü.
“Ni Congress aser Rajya Sabha nungi anenogo. Congress nung lenisüba tazüngla asüba agi ni anen” ta Singh-i ashi.
Assam Pradesh Congress-i memulungi Singh ya 2015 küm Assam nungi Rajya Sabha MP inyaktsü shima liasü.
Assam nungi Rajya Sabha MP ka süaka pai Guwahati mesemdang aser state atema-a mapa kecha meinyak.
“Ni Modi’er sabka sath sabka vikas posemer aser iba jagi BJP nung adentsü lemtet” ta Singh-isa metetdaktsü. Pa ya 1984 nungi Congress nung züngsem ka ama inyaka aru.
Sanjay Singh kinungtsü Ameeta Singh ya UP nung All India Professionals’ Congress mendenbuba liasü saka laia party nungi anenogo aser BJP nung adentsü.
“Ni Congress toktsüba ajanga parnok dak kecha balaka mekongshitsü. Tesüiba küm 15 tsüngda Congress nung atalokba ya kodanga matalokdangba lir” ta Singh-isa ashi.
Singh ya taoba mapang BJP nung liasü. 1990s mapang pai khen BJP ticket amer Lok Sabha nung takok angu.
Amethi nung tamarener kibong nung pa ya züngsem ka lir aser iba tesem nung pa tashi lir.
2019 Lok Sabha election mapang pai Sultanpur nungi toktep saka BJP candidate Maneka Gandhi-i pa madak takok angu.
Badminton champion Syed Modi tepsetba ken o nung Sanjay Singh dak tai tonglokja lir.