Assam Congress yimsüsüba mapang nisung 52,560 tepsetogo: Patowary

Guwahati, February 06 (Agencies): Assam nung Congress teloki yimsüsüba mapang nisung 52,560 taküm samaogo, ta tanü Assam Assembly nung metetdaktsü.
AGP MLA, Ramendra Narayan Kalita ajanga asüngdangba, tezüluba nung telangzüba agütsüdang, nisung tepsetba ken-o nung nübur 20,269 taküm samaogo, ta Parliamentary Affairs minister, Chandra Mohan Patowary-i metetdaktsü.
“2001 nungi 2016 küm, May ita tashi nung telungpurtemi nisung 2,593 tepsetogo aser dowry ken-o nung nisung 1,922 süogo,” ta Chief Minister, Sarbananda Sonowal melen Patowary ajanga ashi. Chief Minister, Sonowal-i Home department-a bena lir.
Kasa mapang nungsa kaketshir 287 soseta asü aser lendong balala nung nisung 27,489 asü, ta Parliamentary Affairs minister-isa metetdaktsü.
Assam nung BJP sorkar aruba sülena 2016 küm June ita nungi 2017 küm January ita tashi nung iba mesükba ken-o nung nisung 2,502 taküm samaogo, ta paisa shisem.
Ita ti tsüngda state nung nisung 827 tepset, telungpurtemi nisung 26 tepset, kaketshir 17 soseta asü, dowry dak sendakba nung nisung 97 asü aser nisung 1,535 lendong balala ajanga asü, ta ashi.
2001 küm nungi 2016 küm tsüngda nung item taküm samaba ken-o dak alaka nisung pua bener aoba 46,461, rakzükraktemba 11,815, auyaba 1,22,793, tashiyim agi auyaba 4,881 aser tetsür dak tashiyim mapa inyakba 22,223 ken-o tem liasü, ta Chandra-isa metetdaktsü.
Ita ti tsüngda nisung pua bener aoba 4,101, rakzükraktemba 974, auyaba 9,141, tashiyim agi auyaba 114 aser tetsür dak tashiyim agi tamajung inyakba 1,294 ken-o tem lir, ta Patowary ajanga House nung metetdaktsü.