Assam den kidanger state 3 nung security akangshiogo

Shillong/Itanagar/Tripura, Luroi (August) 1 (Agencies): Assam nung NRC nung madenba nisungtem aruba noktangtsü atema Assam den kidanger state tem nung security akangshiogo.
Assam-i Arunachal Pradesh den kilometer 804, Tripura den kilometre 53 aser Meghalaya den kilometer 885 shi agi arrtsüa lir. Union home ministry-i item state dang security akangshitsü atema osang sangokja liasü.
Meghalaya nung Khasi Students’ Union (KSU)-i national highway nung ‘checkpoints’ lapoka lir aser nisung 1500 shi ka puteta Assam-i meyipa yok.
Meghalaya district asem- Khasi-Jaintia Hills region, East Jaintia Hills aser West Khasi Hills nung KSU-i ‘infiltration check gates’ lapoka nisungtem miter.
“Ozüng alema arur shinga state telungi maitdaktsütsü atema KSU-i infiltration check gates lapoktsü telemtetba agi” ta KSU tir Lambokstarwell Marngar-i ashi.
“Ratacherra nung ozü züngsemtemi Assam nungi truck gari 30 dak tema nung nisung 1000 dak tema aruba putet. Parnok ajak ket nung India senso ta asüba kulikaket tejangja maliasü aser iba jagi parnok meyipa yok” ta paisa ashi.
Ri Bhoi district nunga nisung 400 shi meyipa yokogo, ta KSU Tirisa shisem.
Assam Police-i Ratacherra nung KSU pur noktangtsü merang saka kaketshirtemi toktep aser East Jaintia Hills police-i tiyongtsü aiba sülen tensaji azüoktet ta osang angazüker.
“State sorkari anti-influx maparen ka metenzük tashi KSU-i ozüng alema arurtem mita reprangtsü. Assam nung NRC nung mezüngokba nisung 40 dak tema alibatemji Meghalaya-i arua jenoktsü akok ta onoki tebilemtsü abener” ta Marngar-i ashi.
“Asenoki kümdanga alitsüla kechiyong final draft list nung madenertemi Meghalaya-i aittsü merangtsü” ta Meghalaya deputy CM Prestone Tynsong-ia metetdaktsüogo.
Arunachal CM Pema Khandu-ia chief secretary aser DGP dang ozüng alema arurtem noktangtsü atema state telungi aittba tesem ajak mita anüktsü atema tetuyuba agütsüogo.
Arunachal Pradesh nung Bengal Eastern Frontier Regulations Act of 1875 ozüng benoka lir aser iba ajanga Inner Line Permit (ILP) malir non-Arunachalee senso shinga state telungi aittsü noktanger.
“Arunachal-i aitba tesem ajak nung security nisungtemi ILP jangjatsüla. NRC sayaba sülen security akangshiogo aser ita kabosa kümdanga mittsü” ta Arunachal CM Pema-i ashi.
Paisa ashiba agi, airports, heliports aser Naharlagun railway station nung kanga akangakanga mittsü.
NRC draft sayaba sülen Arunachal nung law & order timtem kar danga adokra koktettsü atema home department aser police dang renema alitsü tuyur, ta Pema Khandu-isa shisem.