Assam Education Minister-i school tem amokmeren

Guwahati, July 11 (Agencies): Tawa HSLC tatidang nung government school tem result kanga mejungba ajanga Education minister Himanta Biswa Sarma-i school principal tem dang kanga junga inyakang mesüra anendaktsütsü ta amokmerenogo.
HSLC tatidang nung school tem result asadangba mapang minister-i ashiba agi, “Voluntary retirement mesera tapet temerenshi amala ozüng tesashi kar result tajung magütsüba school mesera idakji inyaker tesayurtem agütsütsü.”
Provincialized sür aliba school tem nung kaketshirtem züngoksemba ren nung aibelenba putetra item school tem de-provincialized sütsütsü, ta paisa ashi.
“School tem lepa reprangshiba mapang ngutetba agi, tawa provincialized asüba school tem kar nungbo kaketshirtem ter dak nungi tekübok lir. Temzüng nung aliba ama school ka provincialized asütsü atema kaketshir 30 bo sa alitsüla. Iba den külemi ‘provincialization’ dak sendakba nung tanga tashishitsü aika reprangtetogo aser school record tem SEBA record tem den medemdanga asadangtsü. Onoki data tai agütsüba school tem de-provincialize sütsütsü,” ta Sarma-i ashi.
School 93 nungi kaketshir tem pass asüba shilem 10 dak tekübok liasü aser iba tamakok atema school principal tem khuret asütsü. “Onok item school tem nung tesayurtem asadangtsü asoshi telok ka yokogo. Iba telok yagi local tem den sensaksemtsü aser parnoki ngutetba kulitem dak ajemdaker jenjang teim agia inyaktsü. Nüngdak dang süra item school tem tang school tem den lokteptsütsü aser tesayurtem tanga school-i yoktsü,” ta minister-isa ashi.
Tangar memenepba school tem atema Whatsapp group ka dentettsü aser iba ajanga principal-i school nung tesayurtem anepdang assembly nungi tenzüka school matemtashi koda inyaksangshir iba osang agütsüdaktsütsü, ta minister-i sangdong.