Assam election nung AGP-i menden 24 nungi tokteptsü: BJP

New Delhi, March 03 (Agencies): Brihostibarnü BJP-i, taruba Assam Assembly election nung menden 126 nungi Asom Gana Parishad (AGP)-i menden 24 nung tokteptsü, ta metetdaktsü.
“Assam nung BJP aser AGP na onük ka nung bangjemer- Bangladesh nungi ozüng alema aitba nokdangtsü” ta BJP lenir aser Union Minister, Ravi Shankar Prasad-i tanü osangbenertem dang ashi.
Paisa, “Iba sülen tanabuba onükji- onoki Assam nung ochimashi Tarun Gogoi’er sorkar atsüngtoktsü,” ta ashi.
Yashi taoba mapang Chief minister aser AGP lenir Prafulla Kumar Mahanta-i, taruba Assam assembly election nung BJP aser AGP na longjemer tokteptsü, ta sangdonga liasü.
Mahanta-i, “Onoki BJP Tir den senden amenba mapang taruba Assam election nung külemi senteper tokteptsü,” ta ashi.
Iba senden nung BJP Chief Minister candidate, Sarbananda Sonowal aser AGP Tir Atul Bora nata densema liasü.
Menden 126 aliba Assam Assembly election April-May ita nung agitsü.
2009 küm Lok Sabha election nung BJP aser AGP na senteper toktepdang BJP-i menden 4 aser AGP-i menden ka nung takok ngua liasü.
2014 Lok Sabha election nungbo party ana meloktepi toktep, iba mapang nung BJP-i menden tenet- Dibrugarh, Jorhat, Nagaon, Tezpur, Lakhimpur, Mongoldoi aser Guwahati, nung takok angu saka AGP-ibo menden kata monguteti liasü.