Assam election nung BJP-i meloktepi tokteptsü

Barpeta, October 29 (Agencies): 2016 küm Assam assembly election nung Bharatiya Janata Party (BJP)-i tanga party kecha den-a meloktepi tokteptsü, ta tanü BJP state Tir, Siddhartha Bhattacharya-i ashi.
Asom Sena deputy convener, Hemanta Deuri densena nisung 500 shi BJP nung adenba sülen Bhattacharya-i, “Taruba election nungbo BJP-i tanga party teyari magii Assembly menden 126 prongla nung tokteptsü,” ta ashi.
“Election candidate shimtsü atema VVIP quota malitsü. Tanbo BJP nung adener AGP aser Congress lenirtem aikati tongtibang shilem ka agitsü,” ta paisa ashi.
Bhattacharya-i, “Party züngsemtem longjema alitsü atema state Congress lenirtemi meinyaktet. Parnok lenisüba majungba ajanga Congress lenir aika BJP den denogo,” ta ashi.