Assam Elections 2016: EC ketdangsertemi Assam semdanger

Guwahati, December 21 (Agencies) : Chief Election Commissioner (CEC) Nasim Zaidi-i anir Election Commission nung ketdangser ajak Hombarnü Assam tonga aruogo.
Assam nung sangküm legislative assembly elections agitsü lir aser iba dak sendakba maparen inyakba reprangshimtsü atema EC ketdangsertem tanü Guwahati-i aru.
Zaidi den Election Commissioner na – AK Joti aser OP Rawat nungeri yimten telok balala nungi lenirtem den ajurutepa senden agi.
Assam nung April ita tom ka nung Bohag Bihu mesüra Rongali Bihu ta ajaba benjung amunger aser tanü yimten telok aikati EC ketdangsertem dang iba mapang elections magitsü atema mepishia metetdakja liasü.
“Onoki tanü Election Commission ketdangsertem den ajurutep aser parnoki dang Rongali Bihu matongdang elections agitsü mepishia metetdaktsüogo. Onoki parnoki dang elections shilem ana lemsar agitsü mepishi” ta Asom Gana Parishad (AGP) general secretary, Durga Das Boro-i osangbener dang ashi.
Bharatiya Janata Party (BJP), Congress, All India United Democratic Front (AIUDF), Nationalist Congress Party (NCP) aser Bodoland People`s Front (BPF) teloktem nungi lennirtemia EC ketdangsertem den ajurutepa senden agi.
Ano külen, Communist Party of India-Marxist (CPI-M)-ibo Election Commission dang nübortemi sapuba Rongali Bihu jangratema amungtsü atema iba benjung amungba sülen ang elections agiang ta mepishia liasü.