Assam ex-minister ka senotsü ochi meshii amshiba ken-o nung asüngdangya asü

Guwahati, January 31 (Agencies): Assam Police indang vigilance & anti-corruption wing ajanga taoba mapang Assam Social Welfare minister inyaksang aser Congress lenir, Gautam Roy dang Hombarnü asüngdangya asü. Assam social welfare department nung sen crore 2250 ochimashi amshiba ken-o nung iba asüngdangya ya agi.
Gautam Roy-i social welfare minister anaben(2001-2005, 2015-16) inyaka liasü. Anogo ishika tejaklen, Akon Bora dang kasa ken-o nung asüngdangya süa liasü. Akon Bura-ia iba department nung minister inyaka liasü.
Roy dang ghonda pezü asüngdangya asü aser pa vigilance office nungi adokdang “Ni kecha metsüpur kechiyong ni süpokrem aser ochimashi mapa kecha meinyak,” ta osangbener dang ashi.
Tang tashi nung vigilance temi nisung 26 dang asüngdangya süogo aser item rongnung minister ana aser IAS officer ka densema lir.
Social welfare department ajanga küm shia Assam nung tanur lakh tuku nem chiyongtsü aser oset balala agütsüba bushisüngdangtsü asoshi Assam chief minister Sarbananda Sonowal-i tetuyuba agüja liasü.
Social welfare department nung sen crore 150 ochimashi amshiba, vigilance & anti-corruption ajanga putet.
Taoba mapang minister inyakla, Ajanta Neog-i asüngdangya asütsü asoshi jaoka aliba osang ka arua lir. La February 5 nung asüngdangya asütsü südi, ta osang sangdong.
Taoba mapang iba department nung director inyaka alir nisung ti, vigilance department ajanga asüngdangya asütsü jaoka lir.