Assam hills council-i staff 1,000 shi mapa nungi anentsütsü sentong lir

Guwahati, December 18 (Agencies): North Cachar Hills Autonomous Council (NCHAC) koba ajanga Dima Hasao district kübok general administration, police, treasury, election aser judiciary departments dak alaka department timba ka aachaayanger, parnoki 2016 November ita nung tenzüka tang tashi parnok kübok mapa inyakertem nem itasen magütsüi arudar.
NCHAC puri parnok staff 1,000 shi mapa nungi anendakja voluntary retirement agütsütsü sentong lir, aser iba atema parnoki Assam sorkar dang sen crore 200 meshiogo.
North Cacghar Hills Autonomous Council Employees’ Union (NCHACEU)-i NCHAC telung nung ochimashi aliba aser fund tem mashiyimi amshiba aitsüba den taoba sorkari nüngdak makaba nung mapa aika yanglua nisung aniokba aitsüogo.
“Ita 15 tejakdang administration tasenbai menden atsüngba mapang nung ita teku tashi mapa inyakertem nem itasen magütsüi liasü. Taoba sorkari nüngdak makaba nung parnok kinungertem nem mapa agütsüba ajanga tang iba tensa yagi iogo,” ta NCHAC Chief Executive Member (CEM) Debolal Garlosa-i ashi.
“Ita shia itasen agütsütsüba atema sen crore 6.3 nüngdaker saka onok saru balala nungi aazükba bo crore 2 dang lir. Maneni onoki mapa agizükba mapang nung DA ya shilem 65 liasü aser tangbo shilem 109 kümogo. Anungji onoki iba ya koda anepalutsü? CEM kechaia state aser Centre nungi teyari medeni iba ya takok ngua minyaktettsü,” ta Garlosa-i ashi.
Tang ataloka aliba mepetmesü ya koda bentettsü, ta asüngdang dang Garlosa-i ashiba agi, mapa nung nisung tajemba kümdaktsütsü nüngdaker, aji asü nungdang itasen ishiba agütsütsü, aser saru balala ajungkettsü asoshi inyaktsüla.
Mapa balala nung inyaker parnok 1,000 ya lower primary school tesayurtem aser guard tem dena forest ketdangsertem lir.
NCHACEU tir Prasanna Hasnu-i ashiba agi, taoba Congress sorkari itasen atema ‘grant-in-aid’ ama council nem agüja liasü, saka Assam nung BJP puri sorkar kümtetba sülen iba ya anenadokogo.