Assam-i Arunachal li atsüngba aitsür: AAPSU

Itanagar, September 22 (Agencies): Mongolbarnü Lakhimpur district administration lenisüba kübok Assam Police aser Paramilitary sepaitemi Arunachal Pradesh arrtsü adena aiter Lower Subansiri District kübok Dollungmukh yimdak kiojen teyangludak raksatsüba tatalokbaji sashia aitsür, ta tanü All Arunachal Pradesh Students’ Union (AAPSU)-i sangdong ka ajanga metetdaktsü.
AAPSU-i ashiba agi, Assam sorkari Arunachal Pradesh arrtsülen ali agitsü merangba ajanga mapang shia rara adokdaktsür aser ibaji ajanga nüburtem yimjung raksatsür.
AAPSU-isa, nüngdak makaba nung nüburtem nem timtem agütsüba atema Assam sorkari item ama magistrate nem temerenshi agütsütsüla, ta takhangba agütsü.
AAPSU-i Arunachal sorkar danga tarutsü nungbo item ama mataloktsü atema Assam sorkar den jembidaktsüner, ta temepishiba ka agütsü.
Ano külen AAPSU-i state sorkar dang RMSA aser SSA tesayurtem nem itasen ita aika magütsüi alibaji agütsütsüla, ta mepishi.
AAPSU-isa, sorkari ita aika tesayurtem nem itasen magütsübaji tim masü, kechiyong tesayurtem aika tesem tezülen inyaker, aser state nung tesayurtemi shisaliok tajung agütsütsüsa akumer, ta ashi.