Assam-i Meghalaya li atsünga arur: Meghalaya NGO

Tura, February 13 (Agencies): Meghalaya aser Assam tsüngda ali agi raktepba ken-o maneni adokdagi aser Assam nungeri Meghalaya li atsünga aruba ken-o tasen ka benokogo.
State ana tsüngda arrtsü tebilemtsü mebentetba ajanga iba tesem nung aliba nüburtem tali timtemer. Arrtsü ken-o tajungba kati arua lemtettsü makokba ajanga state anaprong sorkari item tesemtem nung terenlok mapa kecha meinyaker.
Meghalaya indang li Assam nungeri atsünga arur, ta South West Garo Hills kübok aliba Garobadha tesem nungi NGO telok kati Superintendent of Police, Ramesh Singh ajurua ken-o ka benok.
Iba ama ali agi raktepba ya Meghalaya nung aliba Mirzamula aser Takonbari yimtsüngtem aser arrtsü anasa aliba Mankachar jila nung aliba asoshi tamalena NGO teloktemi Deputy Commissioner nem metetdakja liasü.
Tim mesüi ali agiba nungi kümzüktsü asoshi Garo Hills State Movement Committee (GHSMC) nung mendenbuba, Ryan Marak-i police teyari meshi.
“Shishilembartem ket nung kulikaket tejangja meliaka parnoki onok li nung sadoksadoka shishilembar aser item nisungtem ya jungjunga mita mereprangra tarutsü nung parnoki Meghalaya litsü nung arua alitsü aser ibaji ajanga timtem adoktsü,” ta pai ashi.
Garobadha ya Tura jila nungi kilometre 30 pilar lir aser iba tesem nung civil aser police administration asoshi district balaka agüja lir.
“Iba tesem ya police administration atema West Garo Hills küboki aiter aser civil administration atema South West Garo Hills küboki aiter aser ibaji ajanga nüburtem kanga mangmangdaktsür. Anungji iba mangatettep ya tekeraba nung bentettsüla,” ta Garobadha nung aliba kaketshir lenir, Alinford D Sangma-ia ashi.
Iba ken-o ya sorkar den jembiogo aser tekeraba nung telemtetba ka agütsütsü yimlar, ta police tekolakbaia metetdaktsü.