Assam kübok Barak Valley nung Left, Congress, BJP tokteptsü

Silchar, March 14 (Agencies) : Left party temi West Bengal nung taruba assembly elections atema Congress den menden lemsateptsü sentong atonger saka Assam kübok Barak Valley tesem nung parnoki Congress-i mapa junga meinyaker ta aitsütsü.
Assam kübok Bengali nunger teimba sür aliba tesem nung Left party tem, Congress aser Bharatiya Janata Party (BJP) nungertem tsüngda tetoktepba alitsü.
Barak Valley nung district asem lir aser itemji Cachar, Karimganj o Hailakandi nunger lir.
Züngsem 126 agi akümba Assam assembly nung iba tesem nungi menden 15 lir.
April 4, 2016 nü Barak Valley kübok assembly constituency 15 nung election agitsü.
Assam nung Left party 6-i assembly constituency 58 nungi tokteptsü aser item rongnung Barak Valley tesem nunga menden kar dena lir, Communist Party of India-Marxist (CPI-M) central committee züngsem, Bijan Dhar-i ashi.
Tanüngba Left teloktemji- Communist Party of India (CPI), Communist Party of India (Marxist-Leninist), Revolutionary Communist Party of India, Forward Bloc, aser Revolutionary Socialist Party nungertem lir.
“Left party temi Congress aser BJP na den tokteptsü. Assam nung Congress-i sorkar tim meüsüi ketdangsüba onoki metetdaktsütsü” ta Dhar-isa ashi.
CPI-M-i Assam nung constituency 19 nung tokteptsü. Kanga dang tongtipang menden Silchar nungi trade union lennir Supriya Bhattacharjee toktepdaktsütsü, ta paisa shisem.
BJP-ia Silchar constituency nung teinyakdak MLA Dilip Kumar Paul toktepdaktsütsü shimogo. 2014 by elections nung Paul-i takok angu.
Iba menden atema Congress-ibo candidate ano meshim lir. Silchar constituency nungi tokteptsü asoshi Congress ticket meshir nisung pungu lir aser parnokji party general secretary Rajesh Deb, taoba district president Arun Dutta Majumdar, taoba union minister Santosh Monhan Dev kinungtsü Bithika Dev, par jala Bharati Dev, aser taoba Silchar municipal board chairman Tamal Banik nungertem lir, ta osang angazüker.
“Centre nung lennirtemi Silchar menden nung takok ngunür. Iba jagi party-i candidate tajung ka toktepdaktsütsü” ta Silchar nungi Lok Sabha MP, Sushmita Dev-i osangbener dang ashi.
Sushmita ya Santosh Monhan Dev’er jala lir aser Lok Sabha menden mangudang iba assembly nungi MLA inyaka liasü.
CPI-M-i Silchar menden nung takok angubaji 1978 küm liasü. Iba sülen nungi Congress aser BJP nati pezübenben takok nguteta lir.