Assam lanurtemi CM atema Kejriwal aser Sarkar ama lenir aginer

Tezpur (Assam), April 02 (Agencies): Tanü Assam nung kaketshir kati, yangi kaketshirtemi temelenshi ka aginer aser kidanger state Tripura Chief Minister, Manik Sarkar aser  Delhi chief minister, Arvind Kejriwal ama lenirtem aginer, shirnoki state lenla ajaklen terenlok  agütsüba den külemi  Assam nung tamangba lokti ajak ajungtsü atema inyaktsü, ta ashi.
Osangbenertem den jembidang Tezpur University kaketshir, Uddipana Goswami-i, “Onoki temelenshi ka nüngdaker, aser ibaji tejangja. BJP-i parnoki temelenshi bener arutsür ta jembir, ajisüaka tawa tatalokba kar ajanga onok shisabulur,” ta ashi.
Lai ashiba agi, RSS pur Assam telungi aita tamangba lokti tsüngda telemsa adokdaktsütsü atema kaketshirtemi shisabulur. “Tatishitsü ka- tamalenbo shibai kechi achir, iba atema onoki tebilemtsü makai liasü. Ajisüaka tangbo University kaketshirtem tsüngda- pai nashi shi achir, lai ak shi achir ta jembir. Iba nung ya lendong keta lir,” ta Uddipana-isa ashi.
Lar class pur, Sukanya Majumdar-ia, “BJP-i Tarun Gogoi’er sorkari ochimashi inyakba anema nüboyimer, ajisüaka khen mapang ka nung Congress Minister inyaker, Himanta Biswa Sarma parnoki shimogo,” ta ashi.
“Iba den külemi BJP indang advertisement ajak Tarun Gogoi anema dang lir. Parnoki parnok sentong mashir,” ta laisa ashi.
Ano Darrang College nungi kaketshir, Himanka Phukan-i, BJP tashii arura timtem ajurutsüa akok, ajisüaka onoki iba risk agitsü mulunga lir, kechiyong onoki temelenshika aginer. Iba ya an-tokdangba (gamble) den kasa lir. BJP-i junga meinyakra tarutsü nunga onoki parnok melentsü,” ta ashi.
Kasa college nungi Mayuri Bora-ia, “Onoki Rahul Gandhi-i jembiba nung jangratemer, Ato kilonser Narendra Modi densema ajaki terenlok indang jembir. Ajisüaka nangzükba ajanga dangbo mapa makümtsü. Terenlokji koma bener arutsütsü’ar parnoki onok dang kuli sayutsüla,” ta ashi.