Assam: Lipstick anütsü nokdangba osang ajanga mepetmesü adok

Kangkan Kalita, February 17 (Agencies): Mongolbarnü Assam, Morigaon district nung Ghana Kanta Barua (GKB) College nung nung lipstick anütsü nokdangba osang ka ajanga tetsür kaketshirtem aoksadaktsü.
Iba osang students’ union tenüng nung sangdong, koba ajanga mepetmesü adok.
Iba dak sendakba osang nung student union-i ashiba agi, parnoki iba osang magütsü, saka nisung samesa kari parnok tenüng amshia parnok iba timtemi adok.
“Onoki kaketshir ajak college-i arudang uniform semmer arutsü asoshi osang ang agütsü. Onoki memeteti nisung kari iba osang melenshitsü, koba ajanga college campus nung lipstick anütsü nokdangba shisema liasü,’ ta student union nung tongti tezülur, Bikash Bora-i ashi.
“State college ajak nung democratic yimyatem benshitsüla. Nisung kari kaketshirtem indang temeten aser sadema alitsü nokdangtsü merangra, ketdangsertemi yamala timtem azüoktsüla,” ta Education minister, Himanta Biswa Sarma-i ashi.
“Iba osang ajanga onok kanga süngmangdaktsü. Iba osang tangar kari melenshitsübaji ni memeteti liasü, saka lipstick anütsü asoshi nokdangbajibo tashiyim inyakba ozüng ka lir,” ta kaketshir kati ashi.
“College nung uniform asemtsü asoshi teteyubajibo college-i agütsütsü akok, saka ‘cosmetic’ amshitsü asoshi nokdangbajibo kanga tai. Kaketshir azüoktsü tenüng nung parnok kija taküm nung kongshitsüsa ozüng meyanglutsüla,” ta Assam College Principals’ Council tir, B K Das-i ashi.
Maneni college nung otongdar-i, iba osang college-i memalatsü,ta ashi.