Assam lisopur masüba kin troki ST magütsüba atema BJP anema lungkak aittsü

Guwahati, December 11 (Agencies): Centre-i Assam nung lisopur masüba kin troki ST jenjang meshiba menua magütsüba ajanga Assam election nung BJP jenjang mejungi akümtsü akok.
State election atongtsü ita trok dang lia kin trok nungi lenirtemi BJP anema inyaktsü tenzükogo. Parnok kin trok ya tang OBC jenjang nung enokja lir.
Item kin trokji; Tai Ahoms, Koch Rajbongshis, Moran, Motok, Sootea aser Adivasis kintem lir. Item kintem ya Putu 19 mapang, süngo lu inyaktsü asoshi British nungeri Chotanagpur plateau nungi Assam-i anir aruba lir. Parnok ST jenjang meshitsü tenzüker joko mapang talangka arur. Assam nung yimten telok timba kati iba takhangba nung nungiter aser election shia iba o mejembiang malir.
Lok Sabha election mapang BJP-i parnoki nem ST jenjang agütsütsü nangzüka liasü.
“Tan tsüngküm Parliament senden nung Centre-i iba ST bill benoktsüla. Yamaji mesüra onoki lungkak aitba maneni aruyaa aliba election nung BJP anema inyaktsü,” ta All Assam Motok Students Union (ASMSU) nung Tir Arunjyoti Moran-i ashi.
Kin trok nung voters jenti lir aser ibaji ajanga election mapang assembly constituency aika nung parnok kanga nüngdaker.
ASMSU aser kin trok nung tenten balalai tang temendak Parliament senden nung ST bill benokang ta takhangba agüja December 7 nü Jantar Mantar, New Delhi nung lungkak aita liasü.
All Tai Ahom Students’ Union (ATASU) nung Tir Pranjal Rajkonwar-i, “Onoki akhangba menutsüba ajanga state nung BJP candidate tenet (7)-i centre den iba bill atema temulung agüja mejembiba sayur. Congress-ia parnok yimsüsüba mapang onoki akhangba mataloktsü aser BJP-ia kasaji inyaker,” ta ashi.
Rajkonwar-i, Parliament nung onoki aginüba mataloktsüra kin trok nung lenirtemi lemtetba nung ajemdaker December tatemlen nungi onok teinyaktsü inyaktsü, ta shisem.
Iba dak sentakba nung kin trok nem ST jenjang tagütsü ta nokdaker telok, All Assam Tribal Sangha (AATS)-i, Centre-i parnoki takhangba ataloktsüra state nung tribals tem temeten nung achiteta tenokdangba alitsü, ta metetdaktsü.
Centre nung BJP-i aniba sorkari Assam nung lisopur masüba kin trok nem ST jenjang agütsüra state-i tang parnok asoshi mela aliba lokti, rongsenkettsüng, kaketshisatsü, sobaliba aser yimten temeten ajak sota ayutsü, ta AATS sangdong ka ajanga metetdaktsü.