Assam-Meghalaya arrtsü nung tensa majung lir

Shillong, February 15 (Agencies): Meghayala kübok Assam den arrtsüa aliba Umwali yimtsüng nung Assam police-i süng agi züka merenshidang nisung aika kanga mejungi yiru aser ana apu.
Iba tesem ya West Khasi Hills district kübok Langpih anasa lir.
Brihostibarnü M/S Dhar Construction nung mapa inyakertemi Umwali yimtsüng nung electrical poles aser service connection atema ao, ta police ketdangser kati ashi.
Ajisüaka, idangji Assam police tesem tonga ao aser mapa inyakba anendaktsü. Parnokisa nisung ana apu aser iba jagi yimdaklirtemi jashi aser police dak lung agi aon. Mepetmesü adokba ajanga Assam Police-i yimdaklirtem dak süng agi azük.
“Police-i süng agi züka merenshidang nisung kar kanga mejungi yiruba osang angazüker” ta police ketdangserisa ashi.
Langpih nung police in-charge-i tesem tonga ogo aser Mawshynrut civil sub division SDPO danga iba tatalokba indang osang tejangja bushitsü atema tetuyuba agütsüogo.
Langpih indang osang ya mapang shia angashir aser iba tesem ya Meghalaya o Assam tsüngda raktepba tesem ka lir. Meghalaya aser Assam naprongi iba tesem ya par litsü ta kuli agütsüteper.
May 14, 2010 nü Langpih nung Nepali aser Khasi o Garo lisopurtem tsüngda mangatettep adoka raratep aser idangji Assam Police-i injang khaloktsüdang Khasi yimdaklir pezü khaset.
Tanü West Khasi Hills District administration-i Langpih aser temeket nung Section 144 CrPC ozüng alitsü agütsüogo.
Meghalaya chief minister Conrad Sangma-i tanü ashiba agi, Assam den arrtsü indang tebilemtsü ya tanü tasen masü aser terenlok mapa inyakdang teti iba ken o adoker.
State sorkari Assam dang iba ama tatalokba joko mataloktsüla ta shiogo, ta Conrad-isa ashi.