Assam MLA ka mejangjaba nisungtemi amokmeren

Guwahati, November 2 (Agencies): Bodhbarnü Assam nung tang yimsütesüdak BJP sorkar kübok MLA kati ashiba agi, pa dangi bendang lima nungi call ana tashi aru, kong call asürtemi Rohingyas aser Bengali oshi jembiba Muslim tem anema o jembiba atema pa tepsettsüba amokmeren. Iba sülen pai ken o ka benokogo.
“Kü dangi call ana tashi aruogo. Ka United Kingdom aser tangabaji Brehostibarnü Philippines nungi liasü. Item nisungtemi Assam nung Rohingyas aser Bengali oshi jembiba Muslims tem dak sendakba nung pai jembi manenra pa asoshi timtem asütsü, ta amokmerenogo,” ta Hojai MLA Shiladitya Dev-i ashi.
Iba amokmerenba osang angazükba sülen pai Hojai police nem ken o ka agütsüogo.
Taoba mapang nung Dev-i Myanmar nungi Rohingya nungertem Tripura ajanga Assam nung Barak Valley-i aiter, aser Tripura Left Front sorkari parnok yimden yimsüsüba tsütsü ajangzüktsü asoshi item nisungtem Assam-i yoker, ta ashi.
Bharatiya Janata Party leniri ano Assam nung Bengali oshi jembiba Muslim nungertemi parnok Assam senso ta sangdongtsü asoshi akhangba ashishia arudar.
Pai maneni Assam nung ‘char’ tesem, kong Bengali oshi jembiba Muslim nungertem alir, iba tesem ya kiralongrartem adokdak tesem, anungji sorkari iba tesem terenlok asoshi fund tem ojang dang agütsütsüla, ta ashiba ajanga mepetmesü adok.