Assam-Nagaland arrtsülen Border Friendship Olympics asayar

Asayamong ayonger, Mithihe kiyongeri AASU Adviser, Dr. Samujjal Kr Bhattacharya aser NSF General Secretary, Boveio Poukai Duo na nem tabentsü sü abenlokja tetushi agütsüba noksa nung angur.  (Mithihe, December 18)

Dimapur, December 18 (TYO): Assam-Nagaland arrtsülen nüburtem rong nung tesendaktep tajungba kümdaktsütsü nükjidong nung Volleyball Sports Olympic asayamong ka anogo 3 agia asayatsü ayonga yashi, Brehostibar nü nungi tenzüka lir.
Jorhat district kübok Titabar sub-division nung tentetba Medeluajan-Mithihe sector aser Wokha district kübok Changpang circle nung tentetba Mithihe sector nung alir tebur aser tetsür asayartem asoshi iba asayamong ya ayongogo.
Nagaland nungi 3 aser Assam nungi 2 densemba tetsür telok 6 densema, ajak agi telok 23-i iba asayamong nung shilem agitsü tenzüka lir.
“Nagaland aser Assam nübur na tsüngda tesendaktep tajung alitsü nükjidong nung iba asayamong ayongba atema tayonger dang pelaba metetdaktsür. Assam-Arunachal-Meghalaya arrtsülen tentetba tesemtem nunga iba amala asayamong balala ayongtsüla,” ta tanü sentong nung tongti tesemdanger, Dr. Samujjal Kr Bhattacharya, Chief Adviser, All Assam Students’ Union-i ajungshia ashi.
“Arrtsülen alir nüburtem yariba den külemi, state anaprongla sorkar den tongtepratepa tensa tajungba kümdaktsüba atema Border Peace Coordination Committee (Assam-Nagalan) BPCC(A-N)  nem tenüngsang agütsür. Ano, BPCC(A-N) tenzükba küm, 2005 nungi tenzüka, Er. Temsu Wathi Ao-i Coordinator inyaka tongti shilem agiba atema pa tenünga asanger. North East Students’ Organisation (NESO) nungita yariba atema Naga Students’ Federation (NSF) nema tetushi agütsür,” ta pai ashi.
“Nübur ajungai tongti shilem agiba ajanga tan asayamong ya takok ngua asayar. Iba asayamong asayaba ajanga kidangsüa aliba state anaprongla nüburtemi tali sendaktepshia alitsü imlar,” ta  yashi sentong nung tetushi tesemdanger, NSF General Secretary, Boveio Poukai Duo-ia metetdaktsü.
Yashi sentong nung Nagaland nungi Akahuto, Aghautitu, New Amboto, Old Amboto, Mithihe, Shevukhu, Ghoqheto, Azuhoto, New Tssori aser Old Tssori yimtsüngtem nungi lenirtem aser Tengajan o Charaipani Panchayat na densema Assam arrtsülen tentetba yimtsüng 14 nungi lenirtemi shilem agia liasü.
Nagaland aser Assam na arrtsülen tentetba yimtsüngtem nung iba asayamong ya kümshi ayonga asayar.
Ano külen, arrtsülen alir nüburtem yaritsü nükjidong nung Jorhat nung tentetba tongti tenük anepaludak, Chandra Prabha Eye Hospital-i anagati agi tenük tendanga anepalutsü sentong yashi agia liasü.
Iba teyari sentong nung Assam aser Nagaland na nungi nisung 43 tashi tajangzük angu.
Iba asayamong ya asüng, Honibar nü tembangtsü aser asayamong wako taruba asayamong ayongba yimtsüng tonga bener otsütsü.