Assam-Nagaland arrtsülen Maoist maparen bulua inyaker

Jorhat (Assam), October 20 (Agencies): Assam nung Maoists telungpurtem züngsem ajema akümba yong parnoki züngsem tasen shimoktsü sentong yangludar, talisa parnoki arishi küm 12-13 pur dak tenük yoker, ta security osang ka ajanga ashi.

Maoists telungpurtemi süngolu nung aliba lisopur teloktem nungi züngsem anioktsü atema tang benjung mapang maongka agir, ta kasa osang ajanga ashi.

Parnok den yaritepa inyakertem ajanga lanurtem shimtsü asoshi WhatsApp ajanga lanurtem tazüngba, kibong indang aser tesem indang temetettsütem yoker, ta parnokisa ashi.

Maoists-i züngsem tasen shimba ya yaküm tenzük, ajisüaka züngsemtem ita 18 training agitsü atema Jharkhand aser Odisha nati yokba ajanga Maoists camp ana nung par züngsem kanga ajema akümba ajanga parnok kanga ariteper. Tang training agirtemji sangküm January nung meyipa arutsü, ta osang ajangasa ashi.

Brahmaputra tzüyimküm len aliba tesemtem nung 1GB/2GB mobile hand set nung documentary film tatsü yanglua inoker ibaji ajanga arishi küm 12-13 pur Maoists nung adentsü jangradaktsütsü meranger, ta kasa osang ajanga ashi.

Tang Maoists temi parnok tongteprateptsü atema technology tasen amshiba ajanga security sepaitemi Centre aser state naprongla nung police special branch akhanger.

Tawa Maoist lenir Aditya Borah Assam-Nagaland arrtsülen Merapani nungi aruba mapang Golaghat district, Dergaon nung apu, aser ibaji ajanga Assam nung Maoists maparen nung takoksa tulu nguogo, ta parnoki ashi.

Tawa tanü ka nungi Assam-Nagaland arrtsülen aser Merapani nung Maoist maparentem kanga buluogo, ajisüaka Aditya apuba sülen nungi parnok maparen ajema kümogo, ta parnokisa shisem.