Assam-Nagaland arrtsülen yimjung atema senden ka amen

Jorhat, Metsüremi 12, 2018: Tanü Assam-Nagaland arrtsülen yimjung atema peace coordination senden amenba noksa nung angur. Abelen nungi-Manoj Choudhury (Secy), Amal Mili (Exe. Member-Assam), B.P. Bora (President), Antora Bora (Scholar), Imsu Jamir (Vice President), Ridhi Baruah (Scholar), Tiakaba Aier (Exe. Member-Nagaland) aser N. Likok Pongen (Exe. Member-Nagaland).

Kohima/Nakachari, Metsüremi 12 (TYO): Assam-Nagaland arrtsülen aliba tesemtem indang osangtsüsang metetdaktsütsü aser arrtsülen alirtem yimjung nung alitsü atema tanü Darakial Gaon, Nakachari, Jorhat district nung BPCC (A-N) Tir, B. P. Bora’er kidang peace coordination senden ka menogo, ta BPCC (A-N) Tir, B. P. Bora aser BPCC(A-N) tatong Tir, Imsu Jamir nati sangdong ka nung metetdaktsü.
Tanü senden nung state anaprong nungi züngsemtemi arrtsülen mangatettep adokba teratem asadanga liasü. Item rongnung Nagaland nungi aruba garitem Assam nung tsükokba, Assam nunger kisetshiruru Naga nunger tamajungertemi auyaba, foothills nung süngolu Nagaland tsütsü nungi raksatsü ta tai tongloktsüba, Assam nunger yimtsüngtem nung sen akhangba (unreported/unrecorded) densema lir.
BPCC(A-N) tia kaa nüngtugu research scholar, Kr. Antora Borah nüboa nguteta liasü; Assam Nagaland Border Conflict kuli bushiba nung la densema lir.
Osang angazükba agi, lai Assam-Nagaland arrtsülen Merapani sector ajaklen sema senzüogo aser tang lai tanüngba arrtsü tesemtem asadangtsü merangdar, koba ajanga arrtsülen mepetmesü adokba kulitem bushitettsü.
Tang lai Delhi College of Economics nungi “Assam Nagaland Border Conflict – Study of an Emergent Collectivity” onük nung paper ka tezüludak lir.
Senden nungsa züngsemtemi, state anaprong nungi ketdangsertemi arrtsülen alirtem nem mangatetdaktsüra aser lokti tentet balala nem tatalokbatem mangatetdaktsüra gari tsükokba ama tilateri tatalokba ajanga rara tulu adoktsüa akok, ta bangjema liasü, ta sangdong nungsa shia lir.