Assam-Nagaland police-i arrtsülen mita aor

Guwahati, January 13 (Agencies): Deobar aonung mejangjatetba nisungtemi Golaghat nung Borpothar police station officer-in-charge, Vinod Phangso tepsetba sülen Assam Police aser Nagaland Police senteper Assam-Nagaland arrtsülen mejangjatetba prangpong amertemji mita odagi.
Police-i parnokji mejangjar, ajisüaka tamasabo parnoki prangpong amertemji state ana nung gari shibelena ayokertem asütsü südi ta temulung melemi liasü. Ajisüaka, tang bushisüngdang tenzükba sülenbo parnokji telungpurtem ang asütsü südi ta bilemer.
“Phangso ji AK 47 rifle ajanga kahset. Anungji iba ajangaji telungpurtem densema alitsü akok ta asüba onük asoshi kuli tejangja agütsür,” ta Golaghat district Additional Superintendent of Police, Numal Mahatta-i ashi.
Golaghat-Nagaland arrtsülen iba tatalokba tesem, Sungajan nung Karbi aser NDFB(S) telungpur senzüba bushiteter. “Talisa bushisüngdangertemi pei sasa temai adokba telungpurtem densema alitsü südi ta-a bushidagi,” ta paisa ashi.
Taoba ita nunga Sungajan tesem anasa Golaghat police aser Rajib Basumatary leniba nung NDFB(S) telungpurtem tsüngda kahtepogo.
Mahatta-i ashiba agi, Nagaland nung Wokha aser Dimapur district na nungi police-ia iba tesem mita aoba nung shilem tagidak lir.
Mezüngbo Phangso dak injang ana tarak liasü ta bilem saka pa dak tesülen khen dang akah, ta osang ajanga ashi. Aji oda süaka iba tesem nung alirtemibo parnoki injang ola asemben angashi ta ashir.

You must be logged in to post a comment Login