Assam-Nagaland tsüngda arrtsü mangatettep maliasü: UNTABA

Dimapur, September 22 TYO): Assam aser Nagaland na tsüngda sobaliba, akhi aser putiotsü nung arrtsü dak sentakba mangatettep maliasü, kechiyong Chubatemi ibaji jangjajangja lemdanger liasü, ajioda putu aika yamaji aru, anungji nija mesüra telok shingaia ibaji anema menokdaktettsü, ta tanü United Naga Tribes Association of Border Areas (UNTABA) Mendenbuba, Hukavi T. Yeputhomi aser General Secretary, Imsumongba Pongen nati sangdong ka ajanga metetdaktsü.
Akhidang nungi ladanger aliba ya British yimsüsüba kübok parnoki tashi amshia parnoki melungba ama state ana nüburtem tsüngda inyaktsü amokmeren reprangteta Naga nunger lenirtemi asen li temeten kümzüka ayutsü asoshi Kohima nung 1947 küm June 27-29 anogotem nung Ato kilonser, Gobinath Bordoli aser India sorkar tenüng nung Assam Province Angh, Akbar Hydari Ali na leniba nung ‘9 Points Agreement’ ta ajaba yimtenren tezüngzüktep agia liasü, ta sangdong nungsa shia lir.
“Tang India-Naga yimtenren ken o tejembitak mapang ka nung India sorkari taoba mapang nangzükbatem nendaka inyaktsü ta Naga nüburtemi imlaseta atar, iba den külemi tang yimtenren latettsü atema jembiba nung NSCN(IM) lenirtemi Naga nunger aser litsü ‘ochi temeten’ latettsü asoshi kanga meranga inyakba atema onoki pelar,” ta UNTABA-isa ashi.
“MP (BJP), Ram Prasad Sharma ama nisung kati putiotsü junga lateta alidak iba onük nung mapetba o jembibaji kanga tia maka. Iba ya ajanga Central aser Assam sorkar maksütsüba dang masü saka ozüng anema lir, kechiyong iba onük ya tang court nung teinyakdak lir aser okadak lir. State anaprong nungi nija shingaia item ama tagitak makaba aser yimtenren nung tazüngla o mejembitsüla,” ta UNTABA-isa metetdaktsü.