Assam nem maongka balaka agüja aliba Modi-i agien: Sonia Gandhi

Guwahati, March 30 (Agencies): Ato kilonser, Narendra Modi-i, mapang ka nungbo pai Assam süngo yoka liasü ta jembiba sülen anogo ishika lir Bodhbarnü Congress Tir, Sonia Gandhi-i, Assam süngolu nung inyakertem indang pai tera dang meteta lir, ta aitsü.
Assembly election agitsü aliba state Assam kübok Shivsagar nung election nüboyim sentong nung jembidang Congress tongti, Sonia-i, “Modi-i süngolu nung inyakertem dang pelar. Ajisüaka pai parnok atangji tia memetet,” ta ashi.
Süngolu nung inyakertem atema ola adoker aser minimum wage tutsübaji Congress aser asemben tashi Chief Minister inyaksang Tarun Gogoi lir ta shia lai, “Modi sorkari Assam dang koma benshi’ar ibaji ajaki meteta dang lir,” ta ashi.
Assam nunger tzümetsüng lendong den raradang Modi-i chiyungtsü agütsütsü memulung aser UPA sorkari Assam nem maongka balaka agüja aliba Modi-i agien, ta laisa aitsü.
Tawa Ato kilonser Modi-i Tarun Gogoi arishi küm indang jembiba dak sentakba nung Sonia-i, “Kechiba nai Assam nüburtem aser Chief Minister Gogoi mezüngmeshir (?),” ta asüngdang.
Taoba hopta BJP chief minister candidate, Sarbananda Sonowal atema nüboyimtsüdang Modi-i, Gogoi arishi küm 90 lir, Assam-i lanur lenir takotet nüngdaker, ta jembia liasü.