Assam NRC atema party ajak senden ayongtsüla: Congress

New Delhi, Chiteni/July 30 (Agencies): Tanü Congress-i sorkar dang, National Register of Citizens (NRC) onük nung party ajak senden ka tangsa ayongzüktsüla, aser India nunger senso shinga mesendoktsü atema kechi telemtetbasa agiar opposition nem metetdaktsütsüla, ta takhangba agutsü.
Congress Party otongdar, Anand Sharma-i, iba onük nung yimtenren maitdaktsütsüla, ta ashi.
Osangbenertem den jembidang Congress leniri, “Sorkari tangsa party ajak nungi lenirtem senden ka ayongzüktsüla aser parnok telemtetbatem metetdaktsütsüla. Mongolbarnü sendenji ayongra tapet asütsü,” ta ashi.
National Register of Citizens (NRC) dak sendakba onük ajak mebentet tashi nisungtem aser kibongtem mepiladaktsütsüla, ta pai ashi.
“NRC onük ya international onük ka lir, kechiyong ibaji ajanga Bangladesh densema kidanger linüktem-a kongshir. Ibaji ajanga state tema kongshir,” ta Sharma-i ashi.
“NRC tatembangbuba draft inyakyim dak sendakba nung tasüngdangbatem lir,” ta pai ashi.
Paisa sorkar dang, NRC inyakyim nung metokmeperi balala agientsüla aser taoba mapang Ato Kilonser, Rajiv Gandhi lia sign asüba 1985 Assam Accord den tapet süa inyaktsüla, ta takhangba agutsüogo.
Assam Accord of 1985 kübok timtem balalaji metongshitsüla, ta paisa shisem.